༄༅། ། དེ་རིང་སྟེ་བོད་རྒྱལ་ལོ་ ༢༡༥༡ རབ་གནས་ཤིང་འབྲུག་ལོའི་ཟླ་ ༡༢ ཚེས་ ༠༩ ཕྱི་ལོ་ ༢༠༢༥ ཟླ་ ༠༢ ཚེས་ ༠༦ ཉིན་ཤར་ཕྱོགས་ཀྱི་ཡངས་པའི་དབྱིངས་ནས་འོད་སྣང་ཀྱི་སྤྱན་ཟུང་ལྡང་ནས། མ་རིག་པའི་མུན་པ་དེ་བསལ་ཞིང་ཐོ་རངས་ཀྱི་སྐར་ཆེན་དགུང་ལ་ཤར་དུས།
ཀརྨ་པ་རོལ་པའི་རྡོ་རྗེ་སྐབས་སུ་བྱུང་བར་གྲགས་པའི་ཀརྨའི་སྒར་ཆེན་དེ་ཉིད་ཀརྨ་པའི་སྐུ་ཕྲེང་ན་རིམ་བཞིན་དུ་བརྒྱུད་དེ་སྙན་པའི་གྲགས་པ་ས་གསུམ་ཁྱབ་པ། ཀརྨའི་སྒར་ཆེན་འཛམ་གླིང་རྒྱན་ཞེས་པའི་བྱིན་རླབས་ཀྱི་ཚན་ཁ་རབ་ཏུ་འབར་བ་དེ་ཉིད་གོ་ལ་ཆེན་པོ་འདིའི་སྟེེང་དུ་མི་ཉམས་པར་གཏན་དུ་རྒྱུན་སྐྱོང་ཡོང་སླད་དུ། ༧རྒྱལ་དབང་ཀརྨ་པ་སྐུ་ཡི་གསེར་ཕྲེང་འཛིན་པ་བཅུ་བདུན་པ་ཆེན་པོ་ཨོ་རྒྱན་འགྲོ་འདུལ་ཕྲིན་ལས་རྡོ་རྗེ་མཆོག་གིས་སྐུ་ངལ་ཁྱད་དུ་བསད། སྐུ་རྩོལ་གྱི་འབད་པ་བཙན་ཡང། དང་དུ་བླངས། དུས་གསུམ་སངས་རྒྱས་ཐམས་ཅད་མངོན་པར་རྫོགས་པར་འཚང་རྒྱ་བའི་གནས་མཆོག་ཁྱད་པར་ཅན་འདི་རུ་ཡང་། ཆོས་སྒར་ཆེན་མོ་འདི་བཞེངས་ནས་སྒར་ཆེན་འཛམ་གླིང་རྒྱན་ཞེས་མཚན་གསོལ་བའི་སྒར་ཆེན་འདི་ཉིད་ལ་བཞུགས་གནང་བའི་མཆོག་གི་སྤྲུལ་པའི་སྐུ་རྣམ་པ་དང་། མཁན་པོ་བླ་སློབ་དགེ་བའི་བཤེས་གཉེན། དགེ་འདུན་བཙུན་པ་བཙུན་མ་རྣམས་སྐུ་བཞེངས་ནས་ཞལ་འདོན་སྐྱོར་བའི་ལྷང་ལྷང་གི་སྒྲ་ཚངས་པའི་དབྱངས་སྙན་བཞིན་ཁྱབ་པ་དང་འབྲེལ། བཀའ་བརྒྱུད་སྨོན་ལམ་ཆེན་མོ་ཚོགས་བརྡའི་འཁར་རྔ་དིར་དིར་དང་སིང་སིང་རྡུང་བཞིན་དུ། དམ་ཆོས་འདུལ་བ་ལས་ཇི་སྐད་གསུངས་པའི་དགེ་ཚུལ་སློང་གི་བསླབ་གཞི་དང་མཐུན་པའི་ཆོས་གོས་དང་སྣམ་སྦྱར་སོགས་ཡོ་བྱད་རྣམས་བསྣམས་ནས། ཐུགས་དྲན་ཤེས་བག་ཡོད་དང་། ལུས་ཞི་ཞིང་དུལ་བའི་ངང་ནས་རབ་བྱུང་གི་སྡོམ་ལྡན་ལྔའི་འཁོར་ཁྲི་ཚོ་ལ་ཉེ་བ་རྣམས་སྨོན་ལམ་ཚོམས་ཆེན་ནང་དུ་འཛོམས། ༧སྐྱབས་རྗེ་ཟུར་མང་གར་དབང་རིན་པོ་མཆོག་ནས། ༧སྐྱབས་རྗེ་འབོ་དཀར་མཆོག་སྤྲུལ་རིན་པོ་ཆེ་དང་། མཁན་རིན་པོ་ཆེ་བློ་གྲོས་དོན་ཡོད་གཙོས་པའི་བླ་སྤྲུལ་མཁན་པོ་དགེ་བའི་བཤེས་གཉེན་འཁོར་ཚོགས་ཡོངས་ལ་ཐེག་ཆེན་གསོ་སྦྱོང་གི་སྡོམ་པ་གནང་རྗེས། དབུ་མཛད་ལགས་ཀྱིས་སྐྱབས་འགྲོ་སེམས་བསྐྱེད་ཀྱིས་གསལ་བཏབ་ཏེ་བཀའ་བརྒྱུད་སྨོན་ལམ་ཆེན་མོའི་མཛད་རིམ་ལྟར་སྨོན་ལམ་ཞལ་འདོན་དབུ་བཙུགས་གནང། ༧སྐྱབས་རྗེ་ཡོངས་དགེ་མི་འགྱུར་རིན་པོ་ཆེ་མཆོག་གིས་རྡོར་གདན་བྱང་ཆུབ་མཆོད་རྟེན་ཆེན་མོ་ནང་གི་རྟེན་གྱི་གཙོ་བོ་ཐུབ་པའི་སྐུ་བརྙན་མཐོང་གྲོལ་ཆེན་མོ་ལ་ན་བཟའ་ཕུལ་ཅིང་ལྷུང་བཟེད་བསྐང་ནས་ཐུགས་བསྐྱེད་སྨོན་ལམ་གང་རྒྱས་གནང།
དེ་རྗེས་ཚོགས་ཐེངས་གཉིས་པའི་སྐབས་སུ། སྔོན་གྱི་བསླུ་མེད་ལས་སྨོན་གྱི་རྟེན་འབྲེལ་བཟང་པོ་དང་། ཚེ་འདིའི་བཅོས་མིན་གྱི་མོས་གུས་དང་འགྱུར་མེད་དད་པའི་ལང་ཚོ་རབ་ཏུ་ལྡང་བ་ལྷན་དུ་འཛོམས་པའི་མཐུས་ལས་བྱུང་བའི་བདག་ཅག་རྣམས་ཀྱི་མེ་ཏོག་གང་ལ་ཕོག་པའི་ལྷ་སྐལ། ཞྭ་ནག་ཅོད་པན་འཆང་བ་དུས་གསུམ་རྒྱལ་བ་ཀུན་གྱི་ཕྲིན་ལས་ཀྱི་བྱེད་པོ། སྒྲུབ་བརྒྱུད་བསྟན་པའི་མངའ་བདག་༧དཔལ་རྒྱལ་བ་ཀརྨ་པ་སྐུ་ཕྲེང་བཅུ་བདུན་པ་ཆེན་པོ། ཨོ་རྒྱན་ཕྲིན་ལས་དབང་གི་རྡོ་རྗེ་མཆོག་གིས་ཐུགས་བརྩེ་ཟབ་མོའི་སྒོ་ནས་སྨོན་ལམ་ཆེན་མོའི་གསུང་ཆོས་ལ་ཇོ་བོ་རྗེ། དཔལ་ལྡན་ཨ་ཏི་ཤ་མཆོག་གི་རྣམ་ཐར་དབུ་ཚུགས།
དེ་ཡང་ཇོ་བོ་རྗེ་ལ། དི་པཾ་ཀ་ར་ཤྲཱི་ཛྙན། ཨ་ཏི་ཤ་སོགས་མཚན་གྱི་རྣམས་གྲངས་དུ་མ་ཡོད་པ་དང་མཚན་དེ་དག་ཀྱང་ཁོང་གི་ཐུན་མོང་མིན་པའི་ཡོན་ཏན་སོགས་ལ་བརྟེན་ནས་གསོལ་གནང་ཡོད་ཅིང་། མཚན་གསོལ་མཁན་ཡང་རྒྱ་བོད་ཀྱི་མཁས་གྲུབ་དུ་མ་ཡོད་ལ། ཇོ་བོ་རྗེ་རབ་ཏུ་བྱུང་བའི་བརྒྱུད་རིམ་དང་། རྗེ་བཙུན་བྱམས་པ་མགོན་པོ་སོགས་དག་པའི་གཟིགས་སྣང་དུ་མ་བྱུང་ཡོད་པ་མ་ཟད། རབ་ཏུ་མ་བྱུང་གོང་དུ་ཁོང་གི་གཟིམ་ལམ་དུ་ངོ་མཚར་བའི་རྟགས་མཚན་ཁྱད་པར་ཅན་མི་ཉུང་བ་ཞིག་བྱུང་ནས། ཇོ་བོ་རྗེ་རང་ཉིད་རབ་ཏུ་བྱུང་བའི་ཐུགས་ཐག་བཅད་གནང་བའི་སྐོར་དང་། དེ་བཞིན་དུ་ཇོ་བོ་རྗེས་དགུང་ལོ་ཉེར་གཉིས་ནས་དགུང་ལོ་ཉེར་དགུ་བར་དུ་གསང་སྔགས་ཀྱི་ཟབ་ཆོས་རྣམས་དཔྱིས་ཕྱིན་པར་གསན་བསམ་གནང་བ་མ་ཟད། དཔལ་མགོན་འཕགས་པ་ཀླུ་སྒྲུབ་ལས་བརྒྱུད་པའི་ཟབ་མོ་ལྟ་བརྒྱུད་དང་། རྗེ་བཙུན་བྱམས་པ་དང་སློབ་དཔོན་ཐོགས་མེད་སྐུ་མཆེད་ནས་བརྒྱུད་པའི་རྒྱ་ཆེན་སྤྱོད་བརྒྱུད་གཉིས་ཀྱི་ལྟ་གྲུབ་ལ་མཁས་ཤིང་གྲུབ་པའི་སྐྱེ་མཆོག་དམ་པ་ཡིན་ལ། མདོར་ན་ཇོ་བོ་རྗེ་ནི་རིག་པའི་གནས་ལྔ་ལ་མཁས་པའི་དབང་པོ་ཞིག་ཡིན་སྟབས། རྒྱ་གར་འཕགས་པའི་ཡུལ་དང་བོད་གངས་ཅན་ལྗོངས་གཉིས་ཀ་ལ་སྟོན་མཆོག་ཐུབ་པའི་དབང་པོའི་ལུང་རྟོགས་གཉིས་ཀྱི་བདག་ཉིད་དུ་གྱུར་པའི་བསྟན་པ་རིན་པོ་ཆེ་འཛིན་སྐྱོང་སྤེལ་གསུམ་ལ། རླབས་ཆེན་གྱི་མཛད་ཕྲིན་ཟླ་མེད་པའི་བཀའ་དྲིན་གཞལ་མཐའ་མེད་པར་སྐྱོང་མཁན། མཁས་ཤིང་གྲུབ་པའི་སེམས་དཔའ་ཆེན་པོ་ཞིག་ཡིན་ཞིང་། སྤྱིར་ཁོང་གིས་བླ་མ་བརྒྱ་དང་ལྔ་བཅུ་ལྷག་བསྟེན་ཡོད་ཀྱང་། བྱེ་བྲག་ཏུ་བླ་མ་དྷརྨ་རཀྵི་ཏ་དང་བླ་མ་གསེར་གླིང་པ། བྱམས་པའི་རྣལ་འབྱོར་སོགས་གཙོ་བོ་ཡིན་པར་གསུངས། དེ་ཡང་ཇོ་བོ་རྗེ་ཡི་ཞལ་སྔ་ནས་ང་ལ་སེམས་བཟང་པོ་ཅུང་ཙམ་ཡོད་པ་དེ་བླ་མ་གསེར་གླིང་པའི་བཀའ་དྲིན་ཡིན་གསུངས་ཡོད་ཚུལ་སོགས་ཇོ་བོ་རྗེ་ཡི་རྣམ་ཐར་ལེགས་པར་གསུངས་ནས།
དེའི་རྗེས་སུ་བཀའ་བརྒྱུད་སྨོན་ལམ་ཆེན་མོའི་འབྲེལ་ཐོགས་སྦྱིན་པའི་བདག་པོ་རྣམས་གཙོས་པའི་ཤི་གསོན་ཡོངས་ལ་ལྗགས་བསྔོ་དང་ཐུགས་བསྐྱེད་སྨོན་ལམ་ཟབ་རྒྱས་འདུས་པ་རིན་པོ་ཆེ་དང་མཉམ་དུ་གནང་ནས་སྔ་དྲོའི་སྨོན་ལམ་དང་གསུང་ཆོས་ལེགས་པར་གྲུབ་སྟེ། ཞལ་ཟས་རོ་བརྒྱ་ལྡན་པའི་སྨོན་ལམ་གྱི་དགུང་ཚིགས་ལ་རོལ་གནང་།
སླར་ཡང་ཉིན་རྒྱབ་ཕྱག་ཚོད། ༡ : ༣༠ ཐོག་དགེ་འདུན་བཙུན་པ་བཙུན་མ་རྣམས་དང་སྨོན་ལམ་ཚོགས་ཞུགས་གནང་མཁན་སྔགས་འཆང་རྣལ་འབྱོར་ཕོ་མོ་དད་ལྡན་ཡོངས་རྫོགས་སྨོན་ལམ་ཚོམས་ཆེན་གྱི་གདན་འཛོམས་པ་ཆེན་པོ་ལ་འཁོད་ནས་སྨོན་ལམ་ཐམས་ཅད་ཀྱི་རྒྱལ་པོ་འཕགས་པ་བཟང་པོ་སྤྱོད་པའི་སྨོན་ལམ་དེ་ཉིད་༧རྒྱལ་དབང་མཆོག་གིས་མཛད་པའི་གདངས་དབྱངས་ཐོས་པར་ཙམ་གྱིས་དད་པའི་ལང་ཚོ་རབ་ཏུ་འབར་བའི་དབྱངས་སྙན་པོས་གྱེེར་ནས། རིམ་བཞིན་དུ་འཆར་ཅན་ལྟར་སྨོན་ལམ་ཞལ་འདོན་གནང་ཞིང་། བསྔོ་སྨོན་སོགས་ཀྱིས་མཐར་བརྒྱན་ཏེ་ཉིན་གཉིས་པའི་སྨོན་ལམ་ལེགས་པར་མཇུག་བསྡུས་སོ། །
སླར་སྨྲས་པ།
༧རྒྱལ་དབང་ཀརྨ་པ་ཡི་རྨད་བྱུང་ཐུགས་བསྐྱེད་གཡུ་མཚོ་ལས། །
ལྡང་པའི་རྣམ་དཀར་སྤྲིན་ཚོགས་ཡངས་པའི་མཁའ་དབྱིངས་ཁྱོན་ལ་འཁྲིགས། །
ཟབ་ཆོས་བདུད་རྩིའི་སྦྲང་ཆར་སྐལ་ལྡན་མོས་གུས་ཞིང་སར་འབབ། །
འབྲས་བཟང་རྣམ་མཁྱེན་རྒྱལ་བའི་མྱུ་གུ་ཀུན་ལ་སྐྱེ་བར་ཤོག །
ཅེས་སྤྱི་ལོ་ ༢༠༢༥ ཟླ་བ ༢ ཚེས་ ༦ ཉིན་ཀྱི་བཀའ་བརྒྱུད་སྨོན་ལམ་ཆེན་མོའི་གནས་ཚུལ་ཕྱོགས་བསྡུས་པ་ཕྲན་རྒྱལ་ལོ་བཀྲ་ཤིས་ནས་བསྡུས་པར་དགེའོ། །

སྤྱི་ལོ་ ༢༠༢༥ སྤྱི་ཟླ་ ༢ པའི་སྤྱི་ཚེས་ ༡ དགོང་མོ།

སྤྱིར་བཏང་སངས་རྒྱས་བསྟན་པའི་གསོས་སུ་སྨིན་པའི་དཔལ་༧རྒྱལ་དབང་ཀརྨ་པའི་གསང་གསུམ་འཕྲིན་ལས་ཀྱི་མཛད་པ་ཟབ་མོ་ཇི་སྙེད་བསྒྲུབས་དང་སྒྲུབ་བཞིན་པའི་ནང་གསེས་བཀའ་བརྒྱུད་སྨོན་ལམ་ཆེན་མོའི་སྤྱོད་ལམ་རྒྱུགས་སྤྲོད་ཏེ། དེ་ཡང་ལོ་ལྟར་སྨོན་ལམ་མ་ཚོགས་པའི་སྔོན་ཉིན་འགའ་ཤས་རིང་བཀའ་བརྒྱུད་སྨོན་ལམ་ལ་ཕེབས་པའི་དགེ་འདུན་བཙུན་པ་བཙུན་མ་རྣམས་ལ་སྤྱི་ཁྱབ་ཆོས་ཁྲིམས་པ་དབུས་པའི་མཁན་པོ་རྣམ་པས་གཟུ་དཔང་མཛད་དེ་སྔོན་འགྲོའི་སྤྱོད་ལམ་རྒྱུགས་བཞེས་གནང་ཚུལ་ཡོད་ཀྱང་། འདི་ལོ་དམིགས་བསལ་རྒྱུགས་བཞེས་མེད་པར་སྨོན་ལམ་ཆོས་རྭར་ཟབ་སྦྱོང་གི་ལམ་ནས་སློབ་སྟོན་གནང་སོང་། དེ་ཡང་དགོན་སྡེ་ཁག་རེ་རེ་ནས་སྤྱོད་ལམ་རྒྱུགས་སྤྲོད་སྦྱངས་པ་ཡོད་མཁན་དགེ་འདུན་པ་གཉིས་རེ་ཆོས་རའི་གར་སྟེགས་ཐོག་ནས། ན་བཟའ་ནབ་ཚུལ་དང་། དལ་བར་ཕེབས་ཚུལ། ཚོགས་གྲལ་དུ་བཞུགས་ཚུལ། ཕྱག་འཚལ་ཚུལ། གདིང་བ་ཁ་སྒྱུར་ཚུལ་དང་། ཆོས་གོས་དང་སྣམ་སྦྱར་གདིང་བ་གསུམ་ཕྲག་པ་གཡོན་པར་ཇི་ལྟར་གཟར་དགོས་ཚུལ་དང་། ན་བཟའ་ཇི་ལྟར་ལྟེབ་ཚུལ་སོགས་གྲྭ་བཙུན་གསར་པ་རྣམ་པར་མིག་དཔེའི་ཚུལ་དུ་ཟབ་སྦྱོང་གནང་ཡོད་པ་དང་། དེ་དང་ལྷན་དུ་སྤྱི་ཁྱབ་མཁན་རིན་པོ་ཆེ་སྐལ་བཟང་ཉི་མ་མཆོག་ནས་སྤྱོད་ལམ་འདི་གལ་ཆེན་པོ་ཡིན་པ་དང་། རྒྱལ་དབང་མཆོག་གི་ཡུན་རིང་ཚད་ལྡན་འདུལ་བའི་གཞུང་དཔེ་རྙིང་པ་ཁག་ཁུངས་སུ་བཅོལ་ནས་གཏན་འབེབས་གནང་བ་ཞིག་ཡིན་པའི་བྱུང་རབས་རགས་བསྡུས་དང་། གལ་གནད་ཆེན་པོ་ཡིན་པས་རང་རེ་གྲྭ་བཙུན་ཡོངས་ནས་ཐུགས་ཁུར་གནང་དགོས་པ་དང་། ལྷག་པར་དད་ལྡན་དྭངས་བ་འདྲེན་པའི་ཐབས་མཆོག་ཡིན་པས་དྲྭ་ལམ་བརྒྱུད་ནས་འཛམ་གླིང་ཤར་ནུབ་ཀྱི་དད་ལྡན་མང་པོས་གཟིགས་ཀྱི་ཡོད་པ་དང་མཉམ་བཞུགས་གནང་གིས་ཡོད་པས་སྤྱོད་ལམ་ཚུལ་མཐུན་གནང་དགོས་ཚུལ། ལྷག་པར་དད་ལྡན་འགའ་ཤས་བཀའ་བརྒྱུད་སྨོན་ལམ་ལ་བཅར་འདོད་ཀྱི་སྐོམ་པ་ཆུ་འདོད་ལྟར་ཡོད་ཀྱང་བཅར་མ་ཐུབ་པ་མང་པོ་ཡོད་པས་ཚང་མས་ཀུན་སྤྱོད་ཚུལ་མཐུན་གནང་དགོས་པའི་བཀའ་སློབ་བཅས་སྩལ་གནང་སོང་། །
ཞེས་སྤྱི་ལོ་༢༠༢༥/༠༢/༢ ཉིན་བཀའ་བརྒྱུད་སྨོན་ལམ་གནས་ཚུལ་ཕྱོགས་བསྡུས་པ་ཀརྨ་བསོ་རྒྱལ་པས།

ཕྱི་ལོ་ ༢༠༢༥ ཟླ་བ་ ༢ ཚེས་ ༥ ཉིན་སྔ་དྲོ་ཆུ་ཚོད་ ༩ དང་ཕྱེད་ཀའི་ཐོག་སྨོན་ལམ་ཆེན་མོའི་ཆོས་རྭར་རྒྱ་བལ་འབྲུག་གསུམ་གྱི་སྒྲུབ་བརྒྱུད་ཀརྨ་ཀཾ་ཚང་གི་དགོན་སྡེ་ཁག་གི་དགེ་འདུན་གྱི་སྡེ་དང་། དད་ལྡན་ཧི་མ་ལ་ཡི་མི་རིགས་དང་འཛམ་གླིང་ཡུལ་གྲུ་དུ་མ་ཕེབས་པའི་ཆོས་ཞུ་བ་སྟོང་ཕྲག་དུ་མར་འདུས་པ་ན། ༧རྒྱལ་མཆོག་བཅུ་བདུན་པ་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་དེ་ཉིད་༧སྐྱབས་རྗེ་ཟུར་མང་གར་དབང་རིན་པོ་ཆེ། ༧སྐྱབས་རྗེ་མི་འགྱུར་རིན་པོ་ཆེ། ༧སྐྱབས་རྗེ་འབོ་དཀར་མཆོག་སྤྲུལ་རིན་པོ་ཆེ། འབྲས་ལྗོངས་གཞུང་གི་དགེ་འདུན་སྡེ་ཡི་བློན་པོ་སྐུ་ཞབས་བསོད་ནམས་དང་། བཀའ་བརྒྱུད་སྨོན་ལམ་གྱི་འགན་འཛིན་བླ་མ ཆོས་གྲགས། དེ་བཞིན་བཀའ་བརྒྱུད་སྨོན་ལམ་ཆེན་མོའི་ཆོས་ཁྲིམས་པ་བཞི་བཅས་ཀྱིས་སྤོས་སྣེ་དང་རྒྱ་གླིང་སོགས་སེར་སྦྲེང་གིས་ལེགས་པར་བསུས་ཏེ་བཞུགས་ཁྲིར་གདན་དྲངས་མཛད། འདུས་པ་ཡོངས་ནས་ཕྱག་ཕུལ་ཅིང་སོ་སོའི་གྲལ་ལ་བཞུགས་པ་དང་དབུ་མཛད་ཆེན་མོས་རྗེ་བདུན་པས་མཛད་པའི་བྱང་སྡོམ་བརྒྱུད་འདེབས་ཀྱི་ཞལ་འདོན་དབུ་ཚུགས། དེའི་སྐབས་༧རྒྱལ་དབང་ཡིད་བཞིན་ནོར་བུ་མཆོག་གིས་བཀའ་ཆོས་ཉིན་དང་པོ་ཡིན་པས་བོད་ལུགས་རྟེན་འབྲེལ་གྱི་མཛད་སྒོ་ལྟར་འདུས་པ་ཡོངས་ལ་གསོལ་བྱ་དང་འབྲས་སིལ་དྲངས། དད་ལྡན་སྦྱིན་བདག་འགའ་ཞིག་ནས་མནྜལ་སྐུ་གསུང་ཐུགས་རྟེན་འདེགས་འབུལ་ཞུས།
དེ་ནས་༧རྒྱལ་དབང་ཡིད་བཞིན་ནོར་བུ་མཆོག་ནས་བཀའ་བརྒྱུད་སྨོན་ལམ་དུ་ཆིབས་བསྒྱུར་བསྐྱངས་པའི་༧རྒྱལ་བའི་རྒྱལ་ཚབ་དྲུང་གཽ་ཤྲཱི་ཆེན་མོ་མཆོག་དང་། ཟུར་མང་གར་དབང་རིན་པོ་ཆེ། མི་འགྱུར་རིན་པོ་ཆེ། འབོ་དཀར་མཆོག་སྤྲུལ་རིན་པོ་ཆེ་དབུས་སྤྲུལ་པའི་སྐུ་རྣམ་པ་དང་། མཁན་རིན་པོ་ཆེ་བློ་གྲོས་དོན་ཡོད་དབུས་པའི་མཁན་སློབ་དགེ་བའི་བཤེས་གཉེན་རྣམ་པ་དང་། སྐྱབས་གནས་དགེ་འདུན་གྱི་སྡེ་བཙུན་པ་དང་བཙུན་མའི་སྡེ་རྣམ་པ་དང་། དེ་བཞིན་ཕྱོགས་མཐའ་ཁག་ནས་ཕེབས་པའི་དད་ལྡན་མི་དམངས་ཡོངས་ལ་སྐུ་ཁམས་བཟང་བའི་འཚམས་འདྲི་དང་འབྲེལ་གསུང་ཆོས་དབུ་འཛུགས་གནང་།

སྤྱིར་བཏང་ད་ལན་གྱི་གསུང་ཆོས་དེ་ཉིད་༧རྒྱལ་དབང་ཡིད་བཞིན་ནོར་བུ་མཆོག་སྐུ་དངོས་སུ་རྒྱ་གར་དུ་ཕེབས་མི་ཐུབ་པར་བརྟེན་དྲ་རྒྱ་བརྒྱུད་དེ་གནང་ཡོད། གསུང་ཆོས་དེ་ནི་བོད་བརྒྱུད་ནང་བསྟན་ལོ་རྒྱུས་ཁྲོད་དུ་ཤིན་ཏུ་དྲིན་ཆེ་བའི་ཇོ་བོ་རྗེ་ཡི་རྣམ་ཐར་ཡིན།

ད་ལན་གསུང་ཆོས་ཀྱི་སྐབས་རྣམ་ཐར་བཤད་དགོས་པའི་རྒྱུ་མཚན་ནི་༧རྒྱལ་དབང་མཆོག་ནས་རྒྱུ་མཚན་བཞི་གསུངས་ཏེ།
༡༽ རྒྱུ་མཚན་དང་པོ་ནི། ཇོ་བོ་རྗེ་བོད་དུ་མ་ཕེབས་པའི་གོང་ལ་གསང་སྔགས་ལོག་པར་སྤྱོད་པ་མང་དུ་བྱུང་ཞིང་། ཐེག་པ་གསུམ་དང་མདོ་སྔགས་གཉིས་དམ་པའི་ཆོས་ལ་འགལ་མེད་གཅིག་ཏུ་ཉམས་སུ་ལེན་མི་ཤེས་པའི་དཀའ་ངལ་ཕྲད། དེ་ལ་བརྟེན་ནས་བོད་མངའ་རིས་ཆོས་རྒྱལ་གྱིས་གདན་འདྲེན་ཞུས་ནས། སངས་རྒྱས་བསྟན་པ་ལ་དག་ཐེར་གནང་། ཆོས་སྒྲུབ་པའི་གནད་འགའ་གང་ཡིན་པ་དེ་དག་ལེགས་པར་སྤྲོས་ནས་མན་ངག་མར་བསྟན་པས། བོད་ལ་མདོ་སྔགས་ཟུང་འབྲེལ་དང་། སྡོམ་པ་གསུམ་ཉམས་སུ་ལེན་ཤེས་པ་བྱུང་། རྒྱུ་མཚན་དེ་ལ་བརྟེན་ནས་བོད་ནང་པ་སངས་རྒྱས་ཀྱི་བསྟན་པ་ལ་ཤིན་ཏུ་བཀའ་དྲིན་ཆེ་བས་ཇོ་བོ་རྣམ་ཐར་བཤད་དགོས་པའི་གནད་འགའ་གཅིག་ཡིན།
༢༽ རྒྱུ་མཚན་གཉིས་པ་ནི། བོད་བརྒྱུད་ནང་པ་སངས་རྒྱས་ཀྱི་ཁྲོད་དུ་སྐྱབས་འགྲོ་དང་། སེམས་བསྐྱེད། བློ་སྦྱོང་། བློ་ལྡོག་རྣམ་བཞི་སོགས་ཐེག་པ་ཐུན་མོང་གི་ལམ་གྱི་རིམ་པའི་ཆོས་ཅི་ཞིག་འཆད་ཀྱང་ཐམས་ཅད་ཇོ་བོ་རྗེ་དཔལ་ལྡན་ཨ་ཏི་ཤ་ནས་མ་བརྒྱུད་མེད་པ་ཡིན། རྒྱུ་མཚན་དེ་ལ་བརྟེན་ནས་ཇོ་བོ་རྗེ་ནི་བཀའ་གདམས་པ་ཙམ་མིན་པར་བོད་ཀྱི་ཆོས་བརྒྱུད་ས་དགེ་བཀའ་རྙིང་རིས་སུ་མ་མཆིས་པ་མེད་པ་ལ་ཤིན་ཏུ་བཀའ་དྲིན་ཆེ་བའི་རྒྱུ་མཚན་གྱིས་ཡིན།
༣༽ རྒྱུ་མཚན་གསུམ་པ་ནི། དེ་ནི་དམིགས་བསལ་ཞིག་ཡིན་ཏེ། རི་བོ་དགེ་ལྡན་པ་དང་། དྭགས་པོ་བཀའ་བརྒྱུད་ཆོས་བརྒྱུད་འདི་ཇོ་བོ་རྗེ་ནས་མར་བརྒྱུད་པའི་བཀའ་གདམས་ཀྱི་མན་ངག་དང་། མར་པ་ལོ་ཙྭ་བ་ནས་མར་བརྒྱུད་པའི་གསང་སྔགས་ཀྱི་ཉམས་ལེན་བྱེད་མཁན་ཞིག་ཡིན། ལྷག་པར་དུ་ད་ལྟ་ཡོངས་གྲགས་པའི་དྭགས་པོ་བཀའ་བརྒྱུད་པའི་ཁྱད་ཆོས་དུ་མ་ཞིག་ཇོ་བོ་རྗེ་ནས་མར་བརྒྱུད་པ་ཞིག་ཆགས། དཔེར་ན། སྔོན་འགྲོ་ཆོས་སྐོར་ཞེན་ལོག་ངེས་བྱུང་བྱང་ཆུབ་སེམས་སོགས་གདམས་པ་མང་པོ་ཞིག་ཇོ་བོ་རྗེ་ནས་མར་བརྒྱུད་པ་དང་། དངོས་གཞི་ཕྱག་ཆེན་ལྷན་ཅིག་སྐྱེས་སྦྱོར་དེ་ཡང་ཇོ་བོ་རྗེ་ནས་མར་བརྒྱུད་པ་ཡིན། དེ་བཞིན་ས་ལམ་གྱི་རིམ་པ་ལ་རྣལ་འབྱོར་བཞི་རིམ་ཡང་ཇོ་བོ་རྗེ་ནས་མར་བརྒྱུད་པ་ཡིན་པས། དྭགས་པོ་བཀའ་བརྒྱུད་པའི་གདམས་པ་དུ་མ་ཞིག་ཇོ་བོ་རྗེ་ན་མར་བརྒྱུད་པ་ཡིན་པས་རྒྱུ་མཚན་གྱིས་གསུངས།
༤༽ རྒྱུ་མཚན་བཞི་པ་ནི། རྗེ་སྒམ་པོ་པའི་བཀའ་འབུམ་ནང་དུ་། ཇོ་བོ་ན་རོ་པའི་མན་ངག་རྣམས་ཤིན་ཏུ་ཟབ་མོ་ཡོད། ཡིན་ནའང་བཀའ་གདམས་པའི་ལམ་རིམ་དང་སྦྱར་མ་ཐུབ་ན་མི་གཞན་དག་ལ་དེ་ཙམ་ཕན་ཐོག་མི་ནུས་ཞེས་གསུངས་ཡོད། དྭགས་པོ་ལྷ་རྗེའི་རྗེས་འཇུག་པ་དྭགས་པོ་བཀའ་བརྒྱུད་པ་རྣམས་ལ་གོ་དེ་ལྟ་བུའི་གོ་རྟོགས་ཤིག་ཡོང་དགོས་པའི་རྒྱུ་མཚན་གྱིས་ཡིན། ཇོ་བོ་རྗེ་ནས་མར་བརྒྱུད་པའི་མན་ངག་ཆོས་རྣམས་ལ་བར་སྐབས་ཤིག་ལ་རྩལ་འདོན་ཐུབ་པ་མ་བྱུང་། དེ་ལ་བརྟེན་ནས་ཆོས་ཀྱི་རྨང་གཞི་ཡག་པོ་ཞིག་བྱུང་ཐུབ་ཀྱི་མེད་ཅེས་གསུངས།

དེ་ཡི་རྗེས་སུ་ཇོ་བོ་རྗེ་སྐུ་འཁྲུངས་པའི་ལོ་ཚིགས། སྐུ་འཁྲུངས་ཡུལ་གནའ་སྔ་མོ་དང་དེང་དུ་ས་གནས་གང་དུ་ཡིན་པ། ཡབ་ཡུམ་གྱི་མཚན། རིགས་རྒྱུད། ཆུང་དུས་ཀྱི་མཚན། ཡི་དམ་རྗེ་བཙུན་སྒྲོལ་མ་དང་དམིགས་བསལ་གྱི་འབྲེལ་བ། ཕྱི་ནང་རིག་པའི་གནས་ལ་སློབ་གཉེར་བྱ་བའི་ཚུལ། རིག་པའི་གནས་དེ་དག་ལ་མཁས་པའི་ཚུལ། ལྷག་པར་དུ་གསང་སྔགས་ལ་བསླབ་པའི་ཚུལ། གསང་སྔགས་ཞུ་བའི་གནད་ཆེན་གྱི་བླ་མ་སུ་ཡིན་པའི་སྐོར་ལ། སྔོན་གྱི་ལོ་རྒྱུས་ཀྱི་རྒྱབ་ལྗོངས་ཁུངས་ལྡན་ལ་དེང་དུས་གྱི་མཁས་པའི་བཤད་ཚུལ་ཟུར་བརྒྱན་ནས་ཇོ་བོ་རྗེའི་རྣམ་ཐར་བཀའ་ཁྲིད་ཟབ་རྒྱས་གནང་ངོ། །

གནས་ཚུལ་སྙིང་བསྡུས་ཞིག་གུས་གངས་ལ་ཉི་ཤར་ནས་བྲིས།

ཕྱི་ལོ་ ༢༠༢༥ ཟླ་བ་ ༢ ཚེས་ ༥ ཉིན། བསྐལ་བཟང་གིི་སངས་རྒྱས་སྟོང་རྩ་གཉིས་མངོན་པར་རྫོགས་པར་སངས་རྒྱས་པའི་གནས་རྡོ་རྗེ་གདན་དུ་ལོ་ལྟར་བཞིན་རྒྱལ་ཡོངས་བཀའ་བརྒྱུད་སྨོན་ལམ་ཆེན་མོ་ཐེངས་ ༣༩ པ་དེ་དབུ་ཚུགས་ཡོད། སྤྱིར་བཀའ་བརྒྱུད་སྨོན་ལམ་ཆེན་མོ་ནི་ཕན་བདེའི་འབྱུང་གནས་རྒྱལ་བསྟན་རིན་པོ་ཆེ་དེ་ཉིད་གོ་ལའི་ཁྱོན་ཀུན་ཁྱབ་ཐུབ་པ་དང་། དེའི་མཐུས་འཛམ་གླིང་གོ་ལ་ཟླུམ་བུ་འདིས་མཚོན་པའི་འཇིག་རྟེན་ཁམས་ཀུན་ཞི་བདེའི་དཔལ་ལ་ལོངས་སུ་སྤྱོད་པའི་ཆེད་དུ་ཡིན།

སྨོན་ལམ་ཆེན་མོ་འདི་ཉིད་ཕྱི་ལོ་ ༡༩༨༣ ལོར་༧སྐྱབས་རྗེ་ཀ་ལུ་རིན་པོ་ཆེ་སྐུ་གོང་མ་དང་༧སྐྱབས་རྗེ་འབོ་དཀར་རིན་པོ་ཆེ་སྐུ་གོང་མ་རྣམ་གཉིས་ཀྱིས་དབུ་བཙུགས་ནས་བཟུང་དུས་ད་ལྟའི་བར་མུ་མཐུད་འཚོག་མུས་དང། ད་ལན་བཀའ་བརྒྱུད་སྨོན་ལམ་ཆེན་མོ་ཐེངས་སོ་དགུ་པ་འཚོག་བཞིན་ཡོད། ཕྱི་ལོ་ ༢༠༠༤ ནས་བཟུང་༧རྒྱལ་མཆོག་ཡིད་བཞིན་ནོར་བུ་མཆོག་གིས་ཐུགས་རྗེ་གཟིགས་པ་ཆེན་པོས་སྨོན་ལམ་གྱི་ཐུགས་འགན་ཡོངས་སུ་རྫོགས་པ་བཞེས་ཤིང་། དེ་ལ་བརྟེན་ནས་སྨོན་ལམ་ཆེན་མོའི་གོ་སྒྲིག་སོགས་གནས་སྟངས་ཀུུན་ལ་སྔར་དང་མི་འདྲ་བའི་ཡར་རྒྱས་གོང་འཕེལ་དུ་སོང་སྟེ་ཆོས་བརྒྱུད་གཞན་དུ་མས་ཀྱང་མིག་དཔེའི་ལྟ་བའི་གནས་སུ་གྱུར། ༧རྒྱལ་དབང་ཡིད་བཞིན་ནོར་བུ་གང་གིས་བསྟན་འགྲོ་ཉག་ཅིག་གི་དོན་དུ་ཐབས་མཁས་ལ་ཐུགས་རྗེ་ཆེ་པོས་སྨོན་ལམ་ཆེན་མོ་འདི་ཡི་ཕྱི་ནང་གསང་གསུམ་གྱི་གནས་སྟངས་མ་ལུས་པ་ལ་དགོངས་པ་ཟབ་བཞེས་གནང་ནས། སྔར་རྒྱལ་བ་གོང་མ་རྣམས་ཀྱི་རྣམ་ཐར་ལོ་རྒྱུས་ཀྱི་རྒྱབ་ལྗོངས་ཟབ་མོ་དང་ལྡན་ལ། དུས་རབས་འདི་ཡི་འགྲོ་བ་མི་ཡི་སེམས་ཁམས་དང་བསྟུན་པའི་གསར་བཏོད་རྣམ་པ་ལེགས་པར་མཛད། སྨོན་ལམ་གྱི་ཞལ་འདོན་གྱི་རིམ་པ། ཞལ་འདོན་གྱི་གདངས་དབྱངས། དམ་ཆོས་འདུལ་བ་གཞིར་བཟུང་གིས་སྤྱོད་ལམ་སོགས་དམ་པའི་ཆོས་ཀྱི་ཁྲིམས་ལུགས་ཟབ་མོར་གྱུར་བར་གནང་ནས། ཆོས་བརྒྱུད་གཞན་གཟུར་གནས་བསྟན་འཛིན་གྱི་སྐྱེས་ཆེན་དམ་པ་མང་པོས་ཀྱང་བཀའ་བརྒྱུད་སྨོན་ལམ་ཆེན་མོར་བསྔགས་བརྗོད་ཀྱི་མེ་ཏོག་འཐོར་བ་མང་དུ་བྱུང་། གཞན་འཛམ་གླིང་ཕྱོགས་མཐའ་ཁག་ནས་ཕེབས་པའི་དད་ལྡན་སེར་སྐྱ་རྣམས་ཀྱང་སྨོན་ལམ་གྱི་ཞལ་འདོན་གྱི་གདངས་དབྱངས། དེར་ཕེབས་པའི་དགེ་འདུན་པའི་འདུལ་བ་དང་མཐུན་པའི་སྤྱོད་ལམ་རྣམས་མཇལ་བའི་ཚེ་ཡིད་རབ་ཏུ་འཕྲོག་ནས་དད་པའི་མིག་ཆུ་ཤོར་བའང་ཉུང་ཉུང་མིན། སྨོན་ལམ་གྱི་ཞལ་འདོན་རྣམས་ཀྱང་བོད་སྐད་མ་མཁྱེན་པའི་འཛམ་གླིང་མི་རིགས་གཞན་རྣམས་ཀྱང་ལྷན་དུ་མཉམ་ཞུགས་བྱས་ནས་ཞལ་འདོན་བྱེད་ཐུབ་པའི་ཆ་རྐྱེན་དུ་ཨིན་སྐད་དང་རྒྱ་སྐད་གཙོས་པའི་སྐད་རིགས་མི་འདྲ་བ་ལྔ་བཅུ་ལ་ཉེ་བར་འགྱུར་ཡོད།

མདོར་ན་བཀའ་བརྒྱུད་སྨོན་ལམ་ཆེན་མོ་འདི་ཉིད་༧རྒྱལ་མཆོག་ཡིད་བཞིན་ནོར་བུ་མཆོག་གི་བཀའ་དྲིན་ཉག་ཅིག་ལ་བརྟེན་ནས་ད་ལྟའི་ཆར་དད་ལྡན་དྭངས་བ་འདྲེན་པའི་མིག་རྒྱན། འབྱོར་ལྡན་བསོད་ནམས་གསོག་པའི་ཞིང་ས་དམ་པར་དངོས་སུ་འགྱུར་ནས། འཛམ་གླིང་སྐྱེ་འགྲོ་གྲངས་ལས་འདས་པའི་རྒྱུད་ལ་ཐར་པ་མྱ་ངན་ལས་འདས་པའི་ས་བོན་བསྐྲུན་བཞིན་ཡོད།

ད་ལན་བཀའ་བརྒྱུད་སྨོན་ལམ་ཐེངས་ ༣༩ པའི་སྐབས་སུ། སྔོན་འགྲོའི་བཀའ་ཆོས་སུ་དྲུང་གཽ་ཤྲཱི་པ་ཆེན་པོ་སྐྱབས་མགོན་རྒྱལ་བའི་རྒྱལ་ཚབ་མཆོག་ནས་ཟབ་མོ་མཐར་ཐུག་གི་གདམས་པ་སྐུ་གསུམ་ངོ་སྤྲོད་ཀྱི་བཀའ་ཆོས་ཉིན་གསུམ་གྱི་རིང་ལ་བསྩལ། དངོས་གཞི་སྨོན་ལམ་ཆེན་མོར་༧རྒྱལ་མཆོག་ཡིད་བཞིན་ནོར་བུ་མཆོག་སྐུ་དངོས་ཕེབས་མ་ཐུབ་པར་བརྟེན་སྨོན་ལམ་གྱི་ཚོགས་པས་གསོལ་བ་བཏབ་པ་བཞིན། སྨོན་ལམ་ཆེན་མོའི་ཚོགས་མགོན་དུ་སྐྱབས་མགོན་༧རྒྱལ་བའི་རྒྱལ་ཚབ་དྲུང་གཽ་ཤྲཱི་པ་མཆོག་བཞུགས་ཤིང་། གཞན་བཀའ་བརྒྱུད་བླ་ཆེན་གྱི་གྲས་སུ་༧སྐྱབས་རྗེ་ཟུར་མང་གར་དབང་རིན་པོ་ཆེ། ༧སྐྱབས་རྗེ་ཡོངས་དགེ་མི་འགྱུར་རིན་པོ་ཆེ། ༧སྐྱབས་རྗེ་འབོ་དཀར་མཆོག་སྤྲུལ་རིན་པོ་ཆེ། མཁན་རིན་པོ་ཆེ་བློ་གྲོས་དོན་ཡོད་རྣམས་ཕེབས་ཡོད། གཞན་མཆོག་གི་སྤྲུལ་པའི་སྐུ་དུ་མ་དང་། རྒྱ་བལ་འབྲུག་གསུམ་གྱི་བཀའ་བརྒྱུད་དགོན་སྡེ་ལྔ་བཅུ་ལྷག་ཙམ་གྱི་གྲྭ་བཙུན་སྟོང་ཕྲག་དུ་མ་ཕེབས། ཧི་མ་ལ་ཡི་མི་རིགས་གཙོས་པའི་ཕྱི་རྒྱལ་ཡུལ་གྲུ་དུ་མ་ནས་དད་ལྡན་མི་དམངས་དུ་མ་མཉམ་བཞུགས་བྱས་ཡོད། སྔ་དྲོ་ཆུ་ཚོད་ ༦ པའི་ཐོག་སྨོན་ལམ་ཆེན་པོའི་ཆོས་རྭ་ཆེན་མོར་ཚོགས་བཅར་བ་དད་ལྡན་སེར་སྐྱ་མི་དམངས་ཀུན་འདུས་འཛོམས་གྲུབ་རྗེས་༧སྐྱབས་རྗེ་ཟུར་མང་གར་དབང་རིན་པོ་ཆེ་མཆོག་ནས་ཐེག་པ་ཆེན་པོ་གསོ་སྦྱོང་གི་སྡོམ་པ་བསྩལ། དེ་ནས་སྨོན་ལམ་གྱི་ཞལ་འདོན་དབུ་འཛུགས་གནང་། སྨོན་ལམ་ཆེན་མོའི་གོ་སྒྲིག་གི་འོག་ཆུ་ཚོད་༨ ཐོག་༧སྐྱབས་རྗེ་ཟུར་གར་དབང་རིན་པོ་ཆེ་མཆོག་དང་སྨོན་ལམ་གྱི་ལས་སྣེ་འགའ་ཞིག་བཅས་བྱང་ཆུབ་མཆོད་རྟེན་རིན་པོ་ཆེའི་ནང་ཐུབ་པ་སངས་རྒྱས་ཀྱི་སྐུར་ན་བཟའ་རིན་པོ་ཆེ་དང་ལྷུང་ཟད་འགེང་ཕུལ་གནང་ཡོད། སྨོན་ལམ་ཉིན་ལྔའི་རིང་ལ་སྔ་དྲོའི་ཐུན་གཅིག་༧རྒྱལ་མཆོག་ཡིད་བཞིན་ནོར་བུ་མཆོག་ནས་བོད་བརྒྱུད་ནང་བསྟན་གྱི་ལོ་རྒྱུས་ཁྲོད་དུ་ཤིན་ཏུ་བཀའ་དྲིན་ཆེ་བའི་ཇོ་བོ་རྗེ་དཔལ་ལྡན་ཨ་ཏི་ཤའི་རྣམ་ཐར་གྱི་བཀའ་ཁྲིད་གནང་བཞིན་ལགས་སོ། །

གནས་ཚུལ་ཉུང་ངུ་ཞིག་གངས་ལ་ཉི་ཤར་ནས་བྲིས།