སྤྱི་ལོ་༢༠༢༤/༡/༢༢ སྔ་དྲོ།
བཀའ་བརྒྱུད་སྨོན་ལམ་ཆེན་མོ་ཐེངས་སོ་བརྒྱད་པའི་ཉིན་ལྔ་པའི་སྔ་དྲོ། སྤྱི་ལོ་ ༢༠༢༤/༡/༢༢ ཉིན་ཞོགས་པ་དགེ་སློང་དང་དགེ་སློང་མ་རྣམ་པ་དང་། ༧ བྱམས་མགོན་རྡོ་རྗེ་འཆང་དབུས་པའི་སྐྱབས་རྗེ་རིན་པོ་ཆེ་རྣམ་པ་མཆོད་རྟེན་ལ་ཆིབས་བསྒྱུར་བསྐྱངས་སྐབས་རྡོར་གདན་བྱང་ཆུབ་མཆོད་རྟེན་འཛིན་སྐྱོང་ཚོགས་པས་བྱོན་བསུའི་མཇལ་དར་ཕུལ། ཆུ་ཚོད་བརྒྱད་པའི་ཐོག་རྟེན་མ་ཧཱ་བྷོ་དྷི་མཆོད་སྡོང་རིན་པོ་ཆེའི་བྱང་ཕྱོགས་ནས་དབུ་བཙུག་སྟེ། ལྭ་བ་བཀའ་བརྒྱུད་ཐེག་ཆེན་གླིང་གི་ཆོས་ཁྲིམས་པས་དྲི་ཞིམ་སྤོས་ཀྱིས་སྣེ་ཁྲིད་དེ་སྙན་འཇེབས་ཀྱིས་སྙན་དབང་གསོ་བའི་དུང་རྒྱ་གླིང་དང་བཅས། ༧ སྐྱབས་རྗེ་ཟུར་མང་གར་དབང་རིན་པོ་ཆེ་དང་། ༧ སྐྱབས་རྗེ་ཡོངས་དགེ་མི་འགྱུར་རིན་པོ་ཆེ། ༧ སྐྱབས་རྗེ་འབོ་དཀར་མཆོག་སྤྲུལ་རིན་པོ་ཆེ་རྣམ་པས་བདུག་སྤོས་ཀྱིས་མདུན་བསུས། གདན་ས་རུམ་བཏེག་གི་སྒྲུབ་དཔོན་དང་རྡོར་སློབ། དེ་བཞིན་མཆོག་གི་སྤྲུལ་སྐུ་རྣམ་པ། མཁན་པོ་དགེ་བའི་བཤེས་གཉེན་དང་དགེ་སློང་། དགེ་སློང་མ་རྣམ་པས་རྒྱལ་བའི་བཀའ་འགྱུར་རིན་པོ་ཆེ་གླེགས་བམ་རེ་རེ་བཞིན་ཕྲག་ཏུ་བསྣམས་ཏེ་ཤར་ཕྱོགས་ཀྱི་སྒོ་ཆེན་ལ་ཕེབས་པ་དང་། སྒྲུབ་བརྒྱུད་བསྟན་པའི་གཙུག་རྒྱན་སྐྱབས་གཅིག་འཁོར་ལོའི་མགོན་པོ་ ༧ བྱམས་མགོན་རྡོ་རྗེ་འཆང་ཀྭན་ཏིང་ཏཱའི་སི་ཏུ་རིན་པོ་ཆེ་མཆོག་གིས་ཕྱག་ཏུ་དར་དཀར་པོ་ཉིན་མོ་བདེ་ལེགས་ཀྱིས་བཅིང་པའི་སྤོས་ཕོར་ལས། དྲི་ཞིམ་སྤོས་ངད་ཀྱི་དུད་པ་མཁའ་དབྱིངས་སུ་འཁྱིལ་བ་བསྣམས་ཏེ། རྒྱལ་བའི་བཀའ་འགྱུར་རིན་པོ་ཆེ་ཆོས་སྐོར་གྱི་སྤོས་སྣའི་སེར་ཕྲེང་ལ་ཕེབས། དགེ་སློང་དང་དགེ་སློང་མ་སུམ་བརྒྱ་ཙམ་གྱིས་ཞལ་ནས་ཐུབ་མཆོག་དོན་ཀུན་གྲུབ་པའི་མཚན་སྔགས་དབྱངས་སུ་གྱེར་བཞིན་ཆོས་གོས་གསུམ་གྱིས་ལུས་བརྒྱན་པས་མཛེས་ཤིང་ཡིད་དབང་འཕྲོག་པ། མཐོང་ན་མི་མཐུན་པར་མེད་པ་དད་ལྡན་དང་བ་འདྲེན་པའི་ཞི་དུལ་བག་ཕེབས་ཀྱིས་ངང་ནས་མཆོད་རྟེན་ཆེན་མོའི་ཕྱི་སྐོར་ལ་ཕེབས།
ལམ་གྱི་གཡས་གཡོན་དུ་དད་ལྡན་ཆོས་ཞུ་བ་རྣམས་ཕྲེང་བསྒྲིགས་ཏེ་ལག་ཏུ་ལྷ་དར་དཀར་པོ་དང་། ཡིད་དུ་འོང་བའི་མེ་ཏོག་སྣ་ཚོགས། དྲི་ཞིམ་གྱི་བདུག་སྤོས་སོགས་མཆོད་པའི་ཡོ་བྱད་སྣ་ཚོགས་པ་ཐོགས་ཏེ་ངག་ནས་གསོལ་འདེབས་བྱེད་བཞིན། ལ་ལས་རྒྱལ་བའི་བཀའ་འགྱུར་རིན་པོ་ཆེ་དང་བླ་མ་རྣམ་པ་ལས་བྱིན་རླབས་ཞུ། ལ་ལས་མེ་ཏོག་སྣ་ཚོགས་མཁའ་ལ་གཏོར་ཏེ་མེ་ཏོག་གིས་ཆར་བབས་པ་ལྟ་བུ་བྱེད། ལ་ལས་དད་པའི་ཕྱག་རྒྱ་ལས་དར་དང་མེ་ཏོག་སྙིམ་པར་བཅང་སྟེ་རྩེ་གཅིག་ཏུ་གསོལ་བ་འདེབས། ལ་ལས་དད་གུས་སྤྲོ་གསུམ་གྱི་ངང་ནས་བླ་མ་རྣམ་པའི་སྐུ་དང་། རྒྱལ་བའི་བཀའ་འགྱུར་ལ་མེ་ཏོག་འཐོར་བཞིན་ཤིས་ཚིག་བརྗོད། དེ་བཞིན་རྒྱལ་བསྟན་དར་ཞིང་འགྲོ་ཀུན་བདེ་བའི་གསོོལ་འདེབས་སྨོན་ལམ་སོགས་སོ་སོས་དད་གུས་མཚོན་པའི་བྱ་བ་སྣ་ཚོགས་བྱེད་ཅིང་དགེ་སློང་རྣམས་གཤེགས་པའི་རྗེས་སུ་དལ་གྱིས་སྙེགས། རྒྱལ་བའི་བཀའ་འགྱུར་ཆོས་སྐོར་བསྐོར་བ་གཅིག་འཁོར་མཚམས་རྟེན་མ་ཧཱ་བྷོ་དྷིའི་ཤར་ཕྱོགས་ནས་གྲུབ་པར་བགྱིས། ༧ བྱམས་མགོན་རྡོ་རྗེ་འཆང་གི་དབུས་རིན་པོ་ཆེ་རྣམ་པ་དང་། དགེ་འདུན་པ་རྣམས་སྨོན་ལམ་ཆེན་མོའི་ཆོས་རར་ཕྱིར་ཕེབས་གནང་སྟེ་ཆུ་ཚོད་དགུ་དང་ཕྱེད་ཀྱི་ཐོག་༧ བྱམས་མགོན་རྡོ་རྗེ་འཆང་དབུ་བཞུགས་ཀྱི་མཎྜལ་དང་། ཐུབ་བསྟོད་སོགས་འདོན་པ་སྔོན་སོང་གི་རྒྱལ་བའི་བཀའ་འགྱུར་རིན་པོ་ཆེའི་གླེགས་བམ་རྣམས་ཆ་བགོས་ཀྱིས་དག་ཀློག་གི་དབུ་ཚུགས། ཆུ་ཚོད་བཅུ་གཅིག་དང་ཕྱེད་ནས་རྒྱལ་བའི་བཀའ་འགྱུར་ཡོངས་རྫོགས་དག་སྒྲོགས་ལེགས་པར་གྲུབ་ཟིན་ནས་ཉིན་གུང་གསོལ་ཚིགས་གྲོལ།
རྒྱལ་བའི་བཀའ་འགྱུར་ཀློག་པའི་ཕན་ཡོན།
ཐར་མདོ་ལས། འབྲུ་གཅིག་གམ། ཚིག་གཅིག་གམ། ཚིགས་བཅད་གཅིག་འཆང་ངམ་ཀློག་ན་བསོད་ནམས་འདི་ལྟ་བུ་དང་ལྡན་པར་འགྱུར་རོ།། འདི་ལྟ་སྟེ།
གང་གིས་མདོ་སྡེ་འདི་འཛིན་ཡང་། །སྡུག་བསྔལ་ཀུན་དང་ཡོངས་འབྲལ་ལོ། །
ནམ་དུའང་ངན་འགྲོར་མི་ལྟུང་སྟེ། །བདེ་བའི་གནས་སུ་ཕྱིན་པར་འགྱུར། ། ཞེས་ཚིགས་བཅད་གཅིག་འཛིན་པའམ། མདོ་སྡེ་འཛིན་པའི་གང་ཟག་རྣམས་སྡུག་བསྔལ་ལས་གྲོལ་ཏེ་ངན་འགྲོར་མི་ལྟུང་ཞིང་བདེ་ནས་བདེ་བར་བགྲོད་པ་དང་།
དབུས་མཐའ་རྣམ་འབྱེད་ལས། ཡི་གེ་འདྲི་མཆོད་སྦྱིན་པ་དང་། །ཉན་དང་ཀློག་དང་ལེན་པ་དང་། །འཆད་དང་ཁ་དོན་བྱེད་པ་དང་། །དེ་སེམས་པ་དང་བསྒོམ་པའོ། །སྤྱོད་པ་དེ་བཅུའི་བདག་ཉིད་ནི། །བསོད་ནམས་ཕུང་པོ་དཔག་ཏུ་མེད། །ཞེས་ཆོས་སྤྱོད་བཅུའི་ནང་ཚན་དུ་ཆོས་ཉན་པ་དང་། ཀློག་པ། ཁ་འདོན་བྱེད་པ་སོགས་ཀྱི་བསོད་ནམས་ཀྱི་ཕུང་པོ་ནི་རྒྱ་ཆེ་ལ་དཔག་ཏུ་མེད་པ་ཡོད་པ་ཡིན་པར་གསུངས།
འཕགས་པ་སྒོ་མཐའ་ཡས་པས་བསྒྲུབ་པ་ཞེས་བྱ་བའི་གཟུངས་ལས།
མདོ་སྡེ་ཐོས་ནས་རྗེས་སུ་ཡི་རང་དང་། །ཡི་གེར་བྲིས་དང་གཟུང་དང་བཀླགས་པ་ཡིས། །བསོད་ནམས་ཆུ་བོ་ཇི་ཙམ་བསྐྱེད་པ་ནི། །སེམས་ཅན་ཀུན་གྱིས་ཤེས་པར་ཡོང་མི་ནུས། །དེ་ནི་ཚེ་རབས་ཀུན་ཏུ་རྒྱལ་བ་མཐོང་། །དེ་དག་ལས་ཀྱང་དད་པ་བསམ་ཡས་རྙེད། །མདོ་སྡེ་ཟབ་མོ་ཚུལ་ཡང་ཤེས་པར་འགྱུར། །དེ་ནི་མྱུར་དུ་བྱང་ཆུབ་མངོན་འཚང་རྒྱ། །ཞེས་སངས་རྒྱས་ཀྱིས་གསུང་པའི་མདོ་སྡེ་རྣམས་ཐོས་ནས་རྗེས་སུ་ཡི་རང་དང་། ཡི་གེ་བྲིས་པ་དང་། གཟུངས་བཀླགས་པ་སོགས་བྱས་སོ་སྐྱེ་ཕལ་པས་བློ་ཡུལ་ལས་འདས་པའི་བསོད་ནམས་ཐོབ་པ་དང་། མདོ་སྡེའི་དོན་ཤེས་ཤིང་མྱུར་དུ་མངོན་པར་རྫོགས་པ་འཚང་རྒྱ་བ་ཡིན་པར་གསུངས།
ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་ལས།
རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གླེགས་བམ་དུ་བྱས་ཏེ་འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་། ཚུལ་བཞིན་དུ་ཡིད་ལ་བྱེད་པ་དང་། བྲིས་ཤིང་མེ་ཏོག་དང་། ཕྲེང་བ་དང་། སྤོས་དང་། བྱུག་པ་དང་། ཕྱེ་མ་དང་། ན་བཟའ་དང་།གདུགས་དང་། རྒྱལ་མཚན་དང་། བ་དན་དང་། སིལ་སྙན་སྣ་ཚོགས་ཀྱིས་རིམ་གྲོར་བྱེད། བཀུར་སྟིར་བྱེད། ཕུ་དུད་དུ་བྱེད། མཆོད་པར་བྱེད་ན། དེའི་བསོད་ནམས་ཆེས་མང་དུ་འཕེལ་ལོ། །ཞེས་དང་།
དམ་པའི་ཆོས་པད་མ་དཀར་པོ་ཞེས་བྱ་བ་ཐེག་པ་ཆེན་པོའི་མདོ། ཆོས་ཀྱི་རྣམ་གྲངས་འདི་འཛིན་ཏམ། སྟོན་ཏམ། རབ་ཏུ་འཆད་དམ། ཡི་གེར་འདྲིའམ། ཀློག་ན། ཡིད་ཀྱི་ལས་ཀྱི་ཡོན་ཏན་སྟོང་ཉིས་བརྒྱ་པོ་དེ་དག་དང་ལྡན་ཞིང་ཡིད་ཀྱི་དབང་པོ་ཡོངས་སུ་དག་པར་འགྱུར་རོ། །དེ་ཡིད་ཀྱི་དབང་པོ་ཡོངས་སུ་དག་པ་དེས། ཐ་ན་ཚིགས་སུ་བཅད་པ་གཅིག་ཐོས་པས་ཀྱང་དེའི་དོན་མང་པོར་ཤེས་སོ། །ཞེས་མདོ་རྒྱུད་བྱེ་བྲག་པ་རེ་བཀླགས་པས་ཀྱང་བསོད་ནམས་དཔག་ཏུ་མེད་པ་ཐོབ་པར་གསུང་ཞིང་། རྒྱལ་བའི་བཀའ་འགྱུར་རོ་ཅོག་བཀླགས་པའི་དགེ་རྩ་ནི་བརྗོད་ལས་འདས་པ་ཡིན་པ་སྨོས་མ་དགོས་པ་ཡིན་ནོ། །
ཞེས་གནས་ཚུལ་སྙིང་བསྡུས་སུ་ཐུབ་བསྟན་སྦྱིན་པས་སྤྱི་ལོ་༢༠༢༤ ༡ ༢༢ ཉིན་བྲིས་པའོ། །
བཀའ་བརྒྱུད་སྨོན་ལམ་ཆེན་མོ་ཐེངས་སོ་བརྒྱད་པའི་ཉིན་ལྔ་པའི་སྔ་དྲོ། སྤྱི་ལོ་ ༢༠༢༤/༡/༢༢ ཉིན་ཞོགས་པ་དགེ་སློང་དང་དགེ་སློང་མ་རྣམ་པ་དང་། ༧ བྱམས་མགོན་རྡོ་རྗེ་འཆང་དབུས་པའི་སྐྱབས་རྗེ་རིན་པོ་ཆེ་རྣམ་པ་མཆོད་རྟེན་ལ་ཆིབས་བསྒྱུར་བསྐྱངས་སྐབས་རྡོར་གདན་བྱང་ཆུབ་མཆོད་རྟེན་འཛིན་སྐྱོང་ཚོགས་པས་བྱོན་བསུའི་མཇལ་དར་ཕུལ། ཆུ་ཚོད་བརྒྱད་པའི་ཐོག་རྟེན་མ་ཧཱ་བྷོ་དྷི་མཆོད་སྡོང་རིན་པོ་ཆེའི་བྱང་ཕྱོགས་ནས་དབུ་བཙུག་སྟེ། ལྭ་བ་བཀའ་བརྒྱུད་ཐེག་ཆེན་གླིང་གི་ཆོས་ཁྲིམས་པས་དྲི་ཞིམ་སྤོས་ཀྱིས་སྣེ་ཁྲིད་དེ་སྙན་འཇེབས་ཀྱིས་སྙན་དབང་གསོ་བའི་དུང་རྒྱ་གླིང་དང་བཅས། ༧ སྐྱབས་རྗེ་ཟུར་མང་གར་དབང་རིན་པོ་ཆེ་དང་། ༧ སྐྱབས་རྗེ་ཡོངས་དགེ་མི་འགྱུར་རིན་པོ་ཆེ། ༧ སྐྱབས་རྗེ་འབོ་དཀར་མཆོག་སྤྲུལ་རིན་པོ་ཆེ་རྣམ་པས་བདུག་སྤོས་ཀྱིས་མདུན་བསུས། གདན་ས་རུམ་བཏེག་གི་སྒྲུབ་དཔོན་དང་རྡོར་སློབ། དེ་བཞིན་མཆོག་གི་སྤྲུལ་སྐུ་རྣམ་པ། མཁན་པོ་དགེ་བའི་བཤེས་གཉེན་དང་དགེ་སློང་། དགེ་སློང་མ་རྣམ་པས་རྒྱལ་བའི་བཀའ་འགྱུར་རིན་པོ་ཆེ་གླེགས་བམ་རེ་རེ་བཞིན་ཕྲག་ཏུ་བསྣམས་ཏེ་ཤར་ཕྱོགས་ཀྱི་སྒོ་ཆེན་ལ་ཕེབས་པ་དང་། སྒྲུབ་བརྒྱུད་བསྟན་པའི་གཙུག་རྒྱན་སྐྱབས་གཅིག་འཁོར་ལོའི་མགོན་པོ་ ༧ བྱམས་མགོན་རྡོ་རྗེ་འཆང་ཀྭན་ཏིང་ཏཱའི་སི་ཏུ་རིན་པོ་ཆེ་མཆོག་གིས་ཕྱག་ཏུ་དར་དཀར་པོ་ཉིན་མོ་བདེ་ལེགས་ཀྱིས་བཅིང་པའི་སྤོས་ཕོར་ལས། དྲི་ཞིམ་སྤོས་ངད་ཀྱི་དུད་པ་མཁའ་དབྱིངས་སུ་འཁྱིལ་བ་བསྣམས་ཏེ། རྒྱལ་བའི་བཀའ་འགྱུར་རིན་པོ་ཆེ་ཆོས་སྐོར་གྱི་སྤོས་སྣའི་སེར་ཕྲེང་ལ་ཕེབས། དགེ་སློང་དང་དགེ་སློང་མ་སུམ་བརྒྱ་ཙམ་གྱིས་ཞལ་ནས་ཐུབ་མཆོག་དོན་ཀུན་གྲུབ་པའི་མཚན་སྔགས་དབྱངས་སུ་གྱེར་བཞིན་ཆོས་གོས་གསུམ་གྱིས་ལུས་བརྒྱན་པས་མཛེས་ཤིང་ཡིད་དབང་འཕྲོག་པ། མཐོང་ན་མི་མཐུན་པར་མེད་པ་དད་ལྡན་དང་བ་འདྲེན་པའི་ཞི་དུལ་བག་ཕེབས་ཀྱིས་ངང་ནས་མཆོད་རྟེན་ཆེན་མོའི་ཕྱི་སྐོར་ལ་ཕེབས།
ལམ་གྱི་གཡས་གཡོན་དུ་དད་ལྡན་ཆོས་ཞུ་བ་རྣམས་ཕྲེང་བསྒྲིགས་ཏེ་ལག་ཏུ་ལྷ་དར་དཀར་པོ་དང་། ཡིད་དུ་འོང་བའི་མེ་ཏོག་སྣ་ཚོགས། དྲི་ཞིམ་གྱི་བདུག་སྤོས་སོགས་མཆོད་པའི་ཡོ་བྱད་སྣ་ཚོགས་པ་ཐོགས་ཏེ་ངག་ནས་གསོལ་འདེབས་བྱེད་བཞིན། ལ་ལས་རྒྱལ་བའི་བཀའ་འགྱུར་རིན་པོ་ཆེ་དང་བླ་མ་རྣམ་པ་ལས་བྱིན་རླབས་ཞུ། ལ་ལས་མེ་ཏོག་སྣ་ཚོགས་མཁའ་ལ་གཏོར་ཏེ་མེ་ཏོག་གིས་ཆར་བབས་པ་ལྟ་བུ་བྱེད། ལ་ལས་དད་པའི་ཕྱག་རྒྱ་ལས་དར་དང་མེ་ཏོག་སྙིམ་པར་བཅང་སྟེ་རྩེ་གཅིག་ཏུ་གསོལ་བ་འདེབས། ལ་ལས་དད་གུས་སྤྲོ་གསུམ་གྱི་ངང་ནས་བླ་མ་རྣམ་པའི་སྐུ་དང་། རྒྱལ་བའི་བཀའ་འགྱུར་ལ་མེ་ཏོག་འཐོར་བཞིན་ཤིས་ཚིག་བརྗོད། དེ་བཞིན་རྒྱལ་བསྟན་དར་ཞིང་འགྲོ་ཀུན་བདེ་བའི་གསོོལ་འདེབས་སྨོན་ལམ་སོགས་སོ་སོས་དད་གུས་མཚོན་པའི་བྱ་བ་སྣ་ཚོགས་བྱེད་ཅིང་དགེ་སློང་རྣམས་གཤེགས་པའི་རྗེས་སུ་དལ་གྱིས་སྙེགས། རྒྱལ་བའི་བཀའ་འགྱུར་ཆོས་སྐོར་བསྐོར་བ་གཅིག་འཁོར་མཚམས་རྟེན་མ་ཧཱ་བྷོ་དྷིའི་ཤར་ཕྱོགས་ནས་གྲུབ་པར་བགྱིས། ༧ བྱམས་མགོན་རྡོ་རྗེ་འཆང་གི་དབུས་རིན་པོ་ཆེ་རྣམ་པ་དང་། དགེ་འདུན་པ་རྣམས་སྨོན་ལམ་ཆེན་མོའི་ཆོས་རར་ཕྱིར་ཕེབས་གནང་སྟེ་ཆུ་ཚོད་དགུ་དང་ཕྱེད་ཀྱི་ཐོག་༧ བྱམས་མགོན་རྡོ་རྗེ་འཆང་དབུ་བཞུགས་ཀྱི་མཎྜལ་དང་། ཐུབ་བསྟོད་སོགས་འདོན་པ་སྔོན་སོང་གི་རྒྱལ་བའི་བཀའ་འགྱུར་རིན་པོ་ཆེའི་གླེགས་བམ་རྣམས་ཆ་བགོས་ཀྱིས་དག་ཀློག་གི་དབུ་ཚུགས། ཆུ་ཚོད་བཅུ་གཅིག་དང་ཕྱེད་ནས་རྒྱལ་བའི་བཀའ་འགྱུར་ཡོངས་རྫོགས་དག་སྒྲོགས་ལེགས་པར་གྲུབ་ཟིན་ནས་ཉིན་གུང་གསོལ་ཚིགས་གྲོལ།
རྒྱལ་བའི་བཀའ་འགྱུར་ཀློག་པའི་ཕན་ཡོན།
ཐར་མདོ་ལས། འབྲུ་གཅིག་གམ། ཚིག་གཅིག་གམ། ཚིགས་བཅད་གཅིག་འཆང་ངམ་ཀློག་ན་བསོད་ནམས་འདི་ལྟ་བུ་དང་ལྡན་པར་འགྱུར་རོ།། འདི་ལྟ་སྟེ།
གང་གིས་མདོ་སྡེ་འདི་འཛིན་ཡང་། །སྡུག་བསྔལ་ཀུན་དང་ཡོངས་འབྲལ་ལོ། །
ནམ་དུའང་ངན་འགྲོར་མི་ལྟུང་སྟེ། །བདེ་བའི་གནས་སུ་ཕྱིན་པར་འགྱུར། ། ཞེས་ཚིགས་བཅད་གཅིག་འཛིན་པའམ། མདོ་སྡེ་འཛིན་པའི་གང་ཟག་རྣམས་སྡུག་བསྔལ་ལས་གྲོལ་ཏེ་ངན་འགྲོར་མི་ལྟུང་ཞིང་བདེ་ནས་བདེ་བར་བགྲོད་པ་དང་།
དབུས་མཐའ་རྣམ་འབྱེད་ལས། ཡི་གེ་འདྲི་མཆོད་སྦྱིན་པ་དང་། །ཉན་དང་ཀློག་དང་ལེན་པ་དང་། །འཆད་དང་ཁ་དོན་བྱེད་པ་དང་། །དེ་སེམས་པ་དང་བསྒོམ་པའོ། །སྤྱོད་པ་དེ་བཅུའི་བདག་ཉིད་ནི། །བསོད་ནམས་ཕུང་པོ་དཔག་ཏུ་མེད། །ཞེས་ཆོས་སྤྱོད་བཅུའི་ནང་ཚན་དུ་ཆོས་ཉན་པ་དང་། ཀློག་པ། ཁ་འདོན་བྱེད་པ་སོགས་ཀྱི་བསོད་ནམས་ཀྱི་ཕུང་པོ་ནི་རྒྱ་ཆེ་ལ་དཔག་ཏུ་མེད་པ་ཡོད་པ་ཡིན་པར་གསུངས།
འཕགས་པ་སྒོ་མཐའ་ཡས་པས་བསྒྲུབ་པ་ཞེས་བྱ་བའི་གཟུངས་ལས།
མདོ་སྡེ་ཐོས་ནས་རྗེས་སུ་ཡི་རང་དང་། །ཡི་གེར་བྲིས་དང་གཟུང་དང་བཀླགས་པ་ཡིས། །བསོད་ནམས་ཆུ་བོ་ཇི་ཙམ་བསྐྱེད་པ་ནི། །སེམས་ཅན་ཀུན་གྱིས་ཤེས་པར་ཡོང་མི་ནུས། །དེ་ནི་ཚེ་རབས་ཀུན་ཏུ་རྒྱལ་བ་མཐོང་། །དེ་དག་ལས་ཀྱང་དད་པ་བསམ་ཡས་རྙེད། །མདོ་སྡེ་ཟབ་མོ་ཚུལ་ཡང་ཤེས་པར་འགྱུར། །དེ་ནི་མྱུར་དུ་བྱང་ཆུབ་མངོན་འཚང་རྒྱ། །ཞེས་སངས་རྒྱས་ཀྱིས་གསུང་པའི་མདོ་སྡེ་རྣམས་ཐོས་ནས་རྗེས་སུ་ཡི་རང་དང་། ཡི་གེ་བྲིས་པ་དང་། གཟུངས་བཀླགས་པ་སོགས་བྱས་སོ་སྐྱེ་ཕལ་པས་བློ་ཡུལ་ལས་འདས་པའི་བསོད་ནམས་ཐོབ་པ་དང་། མདོ་སྡེའི་དོན་ཤེས་ཤིང་མྱུར་དུ་མངོན་པར་རྫོགས་པ་འཚང་རྒྱ་བ་ཡིན་པར་གསུངས།
ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་ལས།
རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གླེགས་བམ་དུ་བྱས་ཏེ་འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་། ཚུལ་བཞིན་དུ་ཡིད་ལ་བྱེད་པ་དང་། བྲིས་ཤིང་མེ་ཏོག་དང་། ཕྲེང་བ་དང་། སྤོས་དང་། བྱུག་པ་དང་། ཕྱེ་མ་དང་། ན་བཟའ་དང་།གདུགས་དང་། རྒྱལ་མཚན་དང་། བ་དན་དང་། སིལ་སྙན་སྣ་ཚོགས་ཀྱིས་རིམ་གྲོར་བྱེད། བཀུར་སྟིར་བྱེད། ཕུ་དུད་དུ་བྱེད། མཆོད་པར་བྱེད་ན། དེའི་བསོད་ནམས་ཆེས་མང་དུ་འཕེལ་ལོ། །ཞེས་དང་།
དམ་པའི་ཆོས་པད་མ་དཀར་པོ་ཞེས་བྱ་བ་ཐེག་པ་ཆེན་པོའི་མདོ། ཆོས་ཀྱི་རྣམ་གྲངས་འདི་འཛིན་ཏམ། སྟོན་ཏམ། རབ་ཏུ་འཆད་དམ། ཡི་གེར་འདྲིའམ། ཀློག་ན། ཡིད་ཀྱི་ལས་ཀྱི་ཡོན་ཏན་སྟོང་ཉིས་བརྒྱ་པོ་དེ་དག་དང་ལྡན་ཞིང་ཡིད་ཀྱི་དབང་པོ་ཡོངས་སུ་དག་པར་འགྱུར་རོ། །དེ་ཡིད་ཀྱི་དབང་པོ་ཡོངས་སུ་དག་པ་དེས། ཐ་ན་ཚིགས་སུ་བཅད་པ་གཅིག་ཐོས་པས་ཀྱང་དེའི་དོན་མང་པོར་ཤེས་སོ། །ཞེས་མདོ་རྒྱུད་བྱེ་བྲག་པ་རེ་བཀླགས་པས་ཀྱང་བསོད་ནམས་དཔག་ཏུ་མེད་པ་ཐོབ་པར་གསུང་ཞིང་། རྒྱལ་བའི་བཀའ་འགྱུར་རོ་ཅོག་བཀླགས་པའི་དགེ་རྩ་ནི་བརྗོད་ལས་འདས་པ་ཡིན་པ་སྨོས་མ་དགོས་པ་ཡིན་ནོ། །
ཞེས་གནས་ཚུལ་སྙིང་བསྡུས་སུ་ཐུབ་བསྟན་སྦྱིན་པས་སྤྱི་ལོ་༢༠༢༤ ༡ ༢༢ ཉིན་བྲིས་པའོ། །
