༸སྐྱབས་རྗེ་མི་འགྱུར་རིན་པོ་ཆེ་མཆོག་བཀའ་བརྒྱུད་སྨོན་ལམ་གྱི་རིན་མེད་སྨན་སྦྱིན་བརྟག་དཔྱད་ཁང་དུ་གཟིགས་ཞིབ་ཆིབས་བསྒྱུར་བསྐྱངས་པ།

ཕྱི་ལོ་ ༢༠༡༩ ཟླ་བ་དང་པོའི་ཚེས་ ༡༦ ཉིན། རིན་མེད་སྨན་སྦྱིན་དང་། བརྟག་དཔྱད་ཁང་འདི་ཉིད་རྒྱལ་ཡོངས་བཀའ་བརྒྱུད་སྨོན་ལམ་ཚོགས་པ་ནས་མཐུན་འགྱུར་བསྒྲུབས་པ་ཞིག་ཡིན་ཏེ། དེ་ཉིད་བི་ཧཱར་འགྲིམས་འགྲུལ་པའི་བཞུགས་གནས་སུ་ཇཱ་ཏ་བི་ཧཱར་ཞེས་པའི་ས་ ཁུལ་དུ་ཆགས་ཤིང་། དེ་ཉིད་ཀྱི་གཙོ་སྐྱོང་དིལླཱིའི་ཀརྨ་པའི་ལས་ཁུངས་ཀྱི་ལས་བྱེད་པ་ལྷག་པ་ཚེ་རིང་ལགས་ནས་བགྱིད་བཞིན་ཡོད།

སྨན་སྦྱིན་བརྟག་དཔྱད་ཁང་དེ་ཉིད་དུ་རྡོར་གདན་ས་གནས་ཉེན་ཀོར་གྱི་ཡུལ་མི་སྨན་བཅོས་ཕྱིར་འགྲོ་གྲོན་གྱི་ཆ་རྐྱེན་ཞན་པའི་མི་མང་ཉམ་ཐག་རྣམས་ཀྱི་ཕྱིིར་བཀའ་བརྒྱུད་སྨོན་ལམ་རིང་ཆེད་འཛུགས་ཞུས་པ་ཞིག་ཡིན། འདི་ལོར་ལས་བྱེད་ལྷ་རྗེ་དྲུག་དང་སྨན་ཞབས་པ་བཅུ་བཞི། དེ་བཞིན་བརྟག་དཔྱད་ཁང་དུ་ཞིབ་དཔྱོད་པ་ཞིག་དང། སྨན་སྦྱིན་པ་གཅིག་བཅས་འདུག ། སྨན་སྦྱིན་ཁང་ནས་སྨན་མཁོ་སྤྲོད་བགྱིས་པ་ཁག་ནི། སྟོབས་སྐྱེད་སྨན་སྣ་ཚོགས། དེ་བཞིན་བུད་མེད་སྦྲུམ་ལྡན་ཀུན་ལ་ཆེད་དུ་སྦྱིན་པའི་སྨན་རིགས། ཁྲག་ཤེད་ཞན་པའི་རིགས་ཀྱིས་བསྟེན་དགོས་པའི་སྨན་རིགས། འཚོ་བཅུད་ཀྱིས་ཕོངས་པའི་བྱིས་པའི་རིགས་ལ་ཟས་བཅུད་བརྟས་པའི་སྨན་ཕྱེ། རྒྱུན་མཁོའི་མགོ་སྨན་དང་ཚ་བའི་སྨན་གྱི་རིགས་སྣ་ཚོགས། དེ་བཞིན་གློ་ནད་དང་ཆམ་ནད་འཇོམས་པའི་སྨན། མངར་ཆའི་ནད་གཞི་འཇོམས་པའི་སྨན་བཅས་རྒྱུན་ལྡན་ཡོངས་གྲགས་ཡིན་པའི་ནད་རིགས་ཕལ་ཆེ་བའི་ཕྱིར་སྨན་མཁོ་སྒྲུབ་ཞུས་ཡོད།