བསྒྲུབ་བྱ། དམིགས་བསལ་མགོན་གསོལ་ཞབས་རིམ་འཕར་མ། ས་གནས། རྡོར་གདན་བཀའ་བརྒྱུད་སྨོན་ལམ་ཆོས་ར། དུས་ཚོད། ཕྱི་ལོ་ ༢༠༡༩ ཟླ་བ་དང་པོའི་ཚེས་ ༢༡ ཉིན།
རྒྱུན་སྲོལ་ལྟར་ན་སྔ་དྲོ་ཆུ་ཚོད་དྲུག་པ་ནས་དགོང་དྲོ་ཆུ་ཚོད་ལྔ་པ་བར་སྨོན་ལམ་ཉིན་བདུན་རིང་བསྟུད་མར་ཚོགས་མཇུག་མར་མེའི་སྨོན་ལམ་གྱི་ ཉིན་གང་པོར་གུང་སེང་འཇོག་སྲོལ་ཡོད་ཀྱང་། འདི་ལོ་དཔལ་༸རྒྱལ་དབང་ཀརྨ་པ་མཆོག་གི་སྐུའི་གསང་བ་གསུམ་གྱི་སྐུ་གེགས་ཀྱི་མཚན་མ་ མཐའ་དག་ཞི་ཞིང་། བསྟན་འགྲོའི་དཔལ་མགོན་དམ་པར་སྐུ་ཚེ་ཞབས་པད་ཡུན་དུ་བརྟན་ཕྱིར་དང་། ཁྱད་པར་དུ་མགོན་པོ་གང་ཉིད་རྒྱ་གར་འཕགས་ པའི་ཡུལ་དུ་མགྱོགས་ནས་མྱུར་དུ་ཞབས་སོར་འཁོད་ཐུབ་པའི་སླད་མགོན་གསོལ་གྱི་ཞབས་རིམ་བསྒྲུབ་རྒྱུར་རང་རེ་ཀཾ་ཚང་དགོན་སྡེ་ཡོངས་ཀྱི་ དགེ་འདུན་མ་ལུས་པས་མཚུར་ཕུ་བླ་བྲང་དང་། བཀའ་བརྒྱུད་སྨོན་ལམ་ཚོགས་པ་ཐུན་མོང་ནས་འབོད་སྐུལ་གོ་སྒྲིག་བགྱིད་དོན་ལྟར་མགོན་གསོལ་ ཚོགས། མར་མེའི་སྨོན་ལམ་གྲུབ་རྟིང་དགེ་འདུན་ཕལ་ཆེ་བ་རང་རང་གི་གནས་སུ་ཕྱིར་ཕེབས་ངེས་ན། རེས་གཟའ་ཟླ་བའི་ཚེས་ ༢༡ བར་སྟོང་གི་ཉིན་མོ་དེ་ ལས་གཞན་དུ་གདམ་ཀ་མ་མཆིས་པས། དེ་ཉིན་མགོན་གསོལ་འཚོག་རྒྱུ་གཏན་འབེབས་བགྱིད་དོན་ལྟར་དགེ་འདུན་པ་ཡོངས་ནས་དོ་ཁུར་ཆེན་ པོས་ཚོགས་སུ་ལེགས་པར་འཛོམས།
ཚོགས་ཞུགས་ཁྱིམ་པ་ཕོ་མོ་མགོན་གསོལ་འདོན་མི་ཐུབ་པ་རྣམས་ནས་བཀྲ་ཤིས་བརྒྱད་པའི་ཚིགས་སུ་བཅད་པ་དང་། དེ་བཞིན་གུ་རུའི་ཚིག་ བདུན་གསོལ་འདེབས།
དཔལ་༸རྒྱལ་དབང་ཀརྨ་པ་སྐུ་འཕྲེང་བཅུ་བདུན་པ་ཆེན་པོ་ཨོ་རྒྱན་ཕྲིན་ལས་རྡོ་རྗེ་མཆོག་གི་ཞབས་བརྟན་གསོལ་འདེབས་ བཅས་ཞབས་རིམ་ཁག་གསུམ་པོ་ཅི་ནུས་གསོག་སྒྲུབ་དགོས་པའི་སྐུལ་མ་བགྱིད་དོན་ལྟར་ཁྱིམ་པ་རྣམས་ནས་ཀྱང་དང་བ་ཆེན་པོས་རང་འཁོས་ བཞིན་ཅི་ནུས་བསྒྲུབས། བསྟན་འཛིན་རྣམ་རྒྱལ་གྱིས་དབྱིན་ཡིག་ལས་ཐད་སྒྱུར་ཞུས།
.
