ཚོགས་ཡུལ། སྨོན་ལམ་དཔེ་མཛོད་ཁང་།
དུས་ཡུན། ཕྱི་ལོ་ ༢༠༢༠ ཟླ་ ༡ ཚེས་ ༡༥ ནས་ ༢༧ བར།
ལོ་ཤས་སྔོན་ནས་དཔལ་༧རྒྱལ་དབང་ཀརྨ་པ་མཆོག་ནས་དབུ་མཛད་ཀྱི་སྦྱོང་བརྡར་དགོས་པའི་བཀའ་ཕེབས་བཞིན། འདི་ལོ་ ༢༠༢༠ ཟླ་ ༡ ཚེས་ ༡༥ ཉིན་ནས་ ཚེས་ ༢༧ དབར་རྒྱལ་ཡོངས་བཀའ་བརྒྱུད་སྨོན་ལམ་ཆེན་མོའི་གོ་སྒྲིག་འོག་ཀརྨ་ཀཾ་ཚང་གི་དགོན་སྡེ་ཁག་ནས་ཕེབས་པའི་གྲྭ་བཙུན་ཞལ་གྲངས་ལྔ་བཅུ་རྩ་དྲུག་ལ་དབུ་མཛད་ཁྲི་ཟུར་འོད་ཟེར་རབ་བརྟན་ལགས་ཀྱི་གཙོ་སྐྱོང་འོག་ཕྱག་རོགས་སུ་དབུ་མཛད་བགྲེས་པ་བཞི་སྟེ། ར་ལང་དཔལ་ཆེན་ཆོས་གླིང་ནས་དབུ་མཛད་བྱམས་པ་འོད་ཟེར་། བན་ཆེན་ཕུན་ཚོགས་དར་རྒྱས་གླིང་ནས་དབུ་མཛད་བློ་གྲོས་རྒྱ་མཚོ་དང་། དཔལ་དིལ་ཡག་དགོན་ནས་དབུ་མཛད་ཀརྨ་ཟླ་བ། ཀརྨ་ལེགས་བཤད་གླིང་ནས་དབུ་མཛད་མཁན་པོ་ཀརྨ་ཆོས་སྐྱིད་བཅས་དབུ་མཛད་རྣམ་པ་ལྔ་ནས་ལམ་སྟོན་སློབ་སྦྱོང་བླ་མེད་དུ་མཛད།
སྤྱིར་བཀའ་བརྒྱུད་སྨོན་ལམ་ཆེན་མོར་༧དཔལ་རྒྱལ་དབང་ཀརྨ་པ་མཆོག་གིས་གསར་གཏོད་མཛད་པའི་ཆོ་གའི་གདངས་དབྱངས་ཇི་སྙེད་ཅིག་མཆིས་ནའང་མཚོན་ཙམ་ཞུས་ན། ལེགས་སྦྱར་སྐད་ཐོག་ཡོད་པའི་སྐྱབས་འགྲོ་དང་ཤེས་རབ་སྙིང་པོའི་རྟ་དབྱངས། དེ་བཞིན་བོད་སྐད་དུ་ཐུབ་བསྟོད། སྒྲོལ་མ་ཉེར་གཅིག་པའི་བསྟོད་པ། ཕྱག་ཆེན་སྨོན་ལམ། མར་མེ་སྨོན་ལམ་ལ་སོགས་པའི་གདངས་དབྱངས་ཀྱི་ཐོག་ཏུ་གོང་གསལ་དབུ་མཛད་གསར་བུ་བ་ཡོངས་ནས་སྦྱོར་བརྡར་གང་ལེགས་མཛད་ཡོད།
